የሕንድ ጠቅላይ ሚኒስትር ናሬንድራ ሞዲ ዜጎቻቸው ለአንድ ዓመት ወርቅ ከመግዛት እንዲቆጠቡ ጥሪ አቀረቡ

የሕንድ ጠቅላይ ሚኒስትር ናሬንድራ ሞዲ የሀገሪቱን የውጭ ምንዛሬ ክምችት ለመጠበቅና ከጊዜ ወደ ጊዜ እየጨመረ የመጣውን የነዳጅ ዋጋ ጫና ለመቋቋም እንዲቻል፣ ዜጎቻቸው ለቀጣዩ አንድ ዓመት የወርቅ ጌጣጌጦችን ከመግዛት እንዲቆጠቡ አስቸኳይ አገራዊ ጥሪ አቅርበዋል።

ጠቅላይ ሚኒስትሩ ይህንን ጥሪ ያቀረቡት በዛሬው እለት ለሀገሪቱ ሕዝብ ባደረጉት ንግግር ሲሆን፣ ሕንድ ለነዳጅ ግዥ የምታወጣው ከፍተኛ የውጭ ምንዛሬ ከዓለም አቀፍ የነዳጅ ዋጋ መናር ጋር ተዳምሮ በምጣኔ ሀብቱ ላይ ከባድ ፈተና እየደቀነ መሆኑን ገልጸዋል። ሕንድ ከቻይና በመቀጠል በዓለም ላይ ከፍተኛ የወርቅ ተጠቃሚ ሀገር እንደመሆኗ መጠን፣ ለወርቅ ግዥ የሚወጣው ቢሊዮኖች የሚቆጠር ዶላር የሀገሪቱን የውጭ ምንዛሬ ክምችት እያመነመነው እንደሚገኝ ባለሙያዎች ሲያስጠነቅቁ ቆይተዋል።

እንደ ጠቅላይ ሚኒስትር ሞዲ ገለጻ፣ ሕንድ አብዛኛውን የነዳጅ ፍላጎቷን ከውጭ ሀገራት የምታስገባ በመሆኑ፣ አሁን ባለው ዓለም አቀፍ ሁኔታ የነዳጅ ዋጋ በከፍተኛ ሁኔታ መጨመሩ የውጭ ምንዛሬ ፍላጎቷን ሰማይ እንዲነካ አድርጎታል። "በአሁኑ ወቅት ቅድሚያ ልንሰጠው የሚገባው የሀገራችንን ምጣኔ ሀብታዊ ደህንነት ነው" ያሉት ጠቅላይ ሚኒስትሩ፣ ዜጎች ለጌጣጌጥና ለቅንጦት ዕቃዎች የሚያወጡትን ወጪ በመቀነስ ለሀገር ግንባታ የበኩላቸውን እንዲወጡ አሳስበዋል።

የሕንድ ምጣኔ ሀብት ባለሙያዎች እንደሚጠቁሙት፣ ሕንድ በየዓመቱ በአማካይ ከ 800 እስከ 900 ቶን የሚመዝን ወርቅ ከውጭ ሀገር ታስገባለች። ይህ ከፍተኛ ፍላጎት በሀገሪቱ የክፍያ ሚዛን (Balance of Payments) ላይ ከፍተኛ ጫና የሚፈጥር በመሆኑ፣ የሞዲ ጥሪ ተግባራዊ ከሆነ የሕንድ ሩፒን ዋጋ ለማረጋጋት ትልቅ እገዛ ይኖረዋል ተብሎ ይታመናል።

የጠቅላይ ሚኒስትሩን ጥሪ ተከትሎ በሕንድ የወርቅ ገበያ ላይ መጠነኛ መናጋት የታየ ሲሆን፣ የወርቅ ነጋዴዎችና የጌጣጌጥ አምራቾች በበኩላቸው ጥሪው በዘርፉ ላይ ሊያሳድር የሚችለውን ተፅዕኖ በስጋት እየተመለከቱት ይገኛሉ። በሕንድ ባሕል ወርቅ ለሠርግና ለተለያዩ ሃይማኖታዊ በዓላት ትልቅ ቦታ የሚሰጠው በመሆኑ፣ ዜጎች ከዚህ ልማዳቸው ተቆጥበው ጥሪውን ምን ያህል ተግባራዊ እንደሚያደርጉት የሚታይ ይሆናል።

ሆኖም መንግሥት ይህንን ጥሪ ተከትሎ የወርቅ አስመጪ ቀረጥን ሊጨምር ወይም ሌሎች የቁጥጥር እርምጃዎችን ሊወስድ እንደሚችል ተገምቷል። ጠቅላይ ሚኒስትሩ ንግግራቸውን ሲያጠቃልሉ "ይህ ውሳኔ ለአንድ ዓመት የሚቆይና ሀገራችን ያለችበትን ጊዜያዊ የምጣኔ ሀብት ጫና ለማለፍ የታለመ ነው" በማለት ዜጎች በሀገር ፍቅር ስሜት እንዲተባበሩ ጠይቀዋል።

የዓለም አቀፍ የነዳጅ ዋጋ በበርሜል ከ 105 ዶላር በላይ በሆነበት በዚህ ወቅት፣ እንደ ሕንድ ያሉ ታዳጊ ሀገራት የውጭ ምንዛሬያቸውን ለማዳን መሰል ጠንካራ እርምጃዎችን መውሰዳቸው የግድ ሳይሆን እንዳልቀረ ዲፕሎማሲያዊ ምንጮች እየገለጹ ይገኛሉ።