የኢትዮጵያን ባህላዊ ሙዚቃ በተለይም የጎጃምን ለስላሳና ማራኪ ዜማዎች በማንጎራጎርና ለትውልድ በማሻገር የሚታወቀው አንጋፋውና ተወዳጁ አርቲስት ሰማኸኝ በለው ከዚህ ዓለም ድካም ማረፉ ተገለጸ።
አርቲስቱ ባደረበት ድንገተኛ ህመም በህክምና ሲረዳ ቆይቶ በትላንትናው ዕለት በሰላም ማለፉን የቅርብ ቤተሰቦቹና የሙያ አጋሮቹ በታላቅ ሀዘን ገልጸዋል።
አርቲስት ሰማኸኝ በለው በሀገራችን የሙዚቃ ታሪክ ውስጥ በተለይ በባህላዊው ዘውግ ላይ የማይረሳ አሻራ ጥሎ ያለፈ ከያኒ ነው። የብዙዎቻችንን የልጅነት ጊዜ በትዝታ ወደኋላ የሚወስዱት፣ በገጠርም ሆነ በከተማ በሰፊው የሚደመጡትና ማህበረሰባዊ እሴትን የጠበቁ ስራዎቹ ዘመን የማይሽራቸው ነበሩ።
"አፈር ለሚበላው ለሚበሰብሰው
ለዚህ ፈራሽ ገላ ቁምጣ መቼ አነሰው"
እያለ ህይወትንና አለምን የሚመዝንባቸው ጥልቅ ፍልስፍና ያዘሉ ግጥሞቹና ዜማዎቹ ዛሬም ድረስ በሰዎች ልብ ውስጥ ህያው ሆነው ይኖራሉ። በከብት ጥበቃ፣ በደማቅ ሰርግና በተለያዩ ህዝባዊ በዓላት ላይ የሰማኸኝን ሙዚቃ ያልሰማ፣ አብሮ ያልጨፈረና ያላንጎራጎረ የለም ማለት ይቻላል። የባህላዊ የአማርኛ ሙዚቃ ሲነሳ ቀድመው ከአእምሯችን ከሚመጡት ጥቂት ከዋክብት መካከል አንዱ እርሱ ነበር።
አርቲስት ሰማኸኝ በለው ከሙዚቃ ስራዎቹ ባሻገር በትህትናው፣ በሀገር ፍቅሩና ለባህል ባለው ታማኝነት በሚያውቁት ዘንድ ሁሉ እጅግ ይወደድና ይከበር የነበረ ድንቅ ሰው ነበር። ሞት የማይቀረው የሰው ልጅ ሁሉ እጣ ፈንታ በመሆኑ፣ የሚሆነው ካለመሆን አያመልጥምና እነሆ ስራዎቹንና ውብ ትዝታዎቹን ለህዝቡ አውርሶ ከዚህ ዓለም ድካም አርፏል።
የአርቲስቱን ስርዓተ ቀብር አስመልክቶ የቀብር አስፈጻሚ ኮሚቴ የተዋቀረ ሲሆን፣ የቀብሩ ስነ-ስርዓት የሚፈጸምበትን ጊዜና ቦታ በቀጣይ ለህዝብ ይፋ እንደሚያደርግ ታውቋል።
ከይር ታይምስ ለአርቲስት ሰማኸኝ በለው ቤተሰቦች፣ ወዳጅ ዘመዶች እንዲሁም ለሙያ አጋሮቹና ለሙዚቃ አፍቃሪያን በሙሉ መፅናናትንና ጥልቅ ሀዘንን ይመኛል።
ነፍስህ በሰላም ትረፍ ሰሜ ባላገሩ!
