የሚኒስትሮች ምክር ቤት ትናንት ሰኔ 2 ቀን 2018 ዓ.ም ባካሄደው 56ኛ መደበኛ ስብሰባው፣ በመካከለኛ ዘመን የማክሮ ኢኮኖሚና ፊስካል ማዕቀፍ እንዲሁም በ2019 በጀት ዓመት የፌዴራል መንግሥት የበጀት ረቂቅ አዋጅ ላይ በሰፊው ተወያይቶ በሙሉ ድምፅ ውሳኔዎችን አሳልፏል።
ምክር ቤቱ በቅድሚያ የተወያየው ከ2019 እስከ 2023 ዓ.ም ለሚዘልቀው የመካከለኛ ዘመን የማክሮ ኢኮኖሚና ፊስካል ማዕቀፍ ላይ ነው። ሀገሪቱ የተሟላ የማክሮ ኢኮኖሚ ሪፎርም ተግባራዊ ማድረግ ከጀመረችበት ጊዜ አንስቶ፣ የኢትዮጵያ ኢኮኖሚ ካሉበት በርካታ ተግዳሮቶች እየተላቀቀና መሰረቶቹም በከፍተኛ ሁኔታ እየተጠናከሩ መምጣታቸው በስብሰባው ላይ ተገልጿል። ይህ የቀረበው አዲስ ማዕቀፍም በኢኮኖሚ ሪፎርሙ የተገኙትን አበረታች ውጤቶች ይበልጥ አጠናክሮ ለማስቀጠል ታስቦ የተዘጋጀ ነው። ማዕቀፉ ዋና ዋና የማክሮ ኢኮኖሚ እና ፊስካል ታሳቢዎችን መሰረት ያደረገ ሲሆን፣ ለ2019 በጀት ዓመት የፌዴራል መንግሥት በጀት ዝግጅት ዋነኛ መነሻ ሆኖ እንዲያገለግል ተዘጋጅቶ ቀርቧል። ምክር ቤቱም በማዕቀፉ አስፈላጊነት ላይ በሰፊው ከተወያየ በኋላ በሥራ ላይ እንዲውል በሙሉ ድምፅ ወስኗል።
በመቀጠልም ምክር ቤቱ ውይይቱን ያደረገው በጉጉት ሲጠበቅ በነበረው የ2019 በጀት ዓመት የፌዴራል መንግሥት የበጀት ረቂቅ አዋጅ ላይ ነው። ይህ የበጀት ረቂቅ የአስር ዓመቱ መሪ የልማት ዕቅድ አካል የሆነውን የ2019-2021 የልማትና ኢንቨስትመንት ዕቅድ ግቦች፣ የመካከለኛ ዘመን (2019-2023) የማክሮ ኢኮኖሚና የፊሲካል ማዕቀፍን እንዲሁም የ2018 በጀት ዓመት የፕሮግራም በጀት አፈጻጸምን መነሻ በማድረግ የተዘጋጀ ነው። ከዚህም በተጨማሪ በቀጣይ ሊመዘገቡ የሚችሉ የማህበራዊና የኢኮኖሚ ትራንስፎርሜሽን አቅጣጫዎችንና ዓላማዎችን፣ የመንግሥትን የፋይናንስ አቅም እና አስፈጻሚ መሥሪያ ቤቶች ከተሰጣቸው ተልዕኮና ኃላፊነት አንጻር የሚያስፈልጋቸውን ወጪዎች በጥብቅ በመገምገም የቀረበ መሆኑ ታውቋል።
በዚሁ መሠረት ለመደበኛ ወጪዎች፣ ለካፒታል ወጪዎች፣ ለክልል መንግሥታት ድጋፍ እና ለዘላቂ የልማት ግቦች (SDGs) ማስፈጸሚያ ድጋፍ የሚውል በአጠቃላይ 2,339,268,126,738 (ሁለት ትሪሊዮን፣ ሦስት መቶ ሰላሳ ዘጠኝ ቢሊዮን፣ ሁለት መቶ ስድሳ ስምንት ሚሊዮን፣ አንድ መቶ ሀያ ስድስት ሺህ፣ ሰባት መቶ ሰላሳ ስምንት ብር) በጀት ለምክር ቤቱ ቀርቧል። ይህ በጀት መንግሥት የጀመራቸውን ግዙፍ ሀገራዊ የልማት ግቦች ለማሳካትና የማህበረሰቡን ሁለንተናዊ ተጠቃሚነት ለማረጋገጥ ወሳኝ ሚና እንደሚኖረው ታምኖበታል።
የሚኒስትሮች ምክር ቤት በቀረበው የፌዴራል መንግሥት የ2019 ረቂቅ በጀት አዋጅ ላይ ዝርዝርና ጥልቅ ውይይት ካካሄደ በኋላ፣ አስፈላጊ የሆኑ ግብዓቶችን በማከል ረቂቅ አዋጁ ለሕዝብ ተወካዮች ምክር ቤት እንዲተላለፍ በሙሉ ድምፅ ወስኗል። የሕዝብ ተወካዮች ምክር ቤትም የቀረበለትን ይህንን ግዙፍ ረቂቅ በጀት መርምሮ በቀጣዮቹ ሳምንታት ያጸድቀዋል ተብሎ ይጠበቃል።
