​የናሳው «ኩሪዮሲቲ» ሮቨር በማርስ ላይ ሰፊ የማር እንጀራ መሰል የጂኦሜትሪ ንድፍ አገኘ

የሜሪካው የጠፈር ምርምር ተቋም (ናሳ) የ «ኩሪዮሲቲ» (Curiosity) መንኮራኩር/ሮቨር በማርስ ፕላኔት ላይ እስከ አድማስ ድረስ የተዘረጋ እና የማር እንጀራ ቅርጽ ያለው ሰፊ የጂኦሜትሪ የመሬት አቀማመጥ ማግኘቱን አስታወቀ።

​ሳይንቲስቶች እንደገለጹት፤ ከተቋሙ የቀደሙ የጠፈር ተልዕኮዎች ጋር ሲነጻጸር አሁን በማርስ ላይ የተገኘው የጂኦሜትሪ ንድፍ በስፋቱና በስርጭቱ አቻ የሌለው ነው።

​«ቫሌ ግራንዴ» (Valle Grande) በተሰኘው የማርስ ሸለቆ ውስጥ የተደረገውን አሰሳ ተክተሎ የተላኩት ምስሎች ከ1.5 እስከ 3 ኢንች (ከ4 እስከ 8 ሴንቲሜትር) ስፋት ያላቸው ባለብዙ ማዕዘን (Polygonal) ስንጥቆች መኖራቸውን ያሳያሉ።

​በተልዕኮው 4,930ኛ እና 4,931ኛ የማርስ ቀናት (ሶል) በተነሳው የ360 ዲግሪ ምዝግብ ምስል ላይ፣ እነዚህ አወቃቀሮች በሁሉም አቅጣጫዎች የተዘረጉ ከመሆናቸውም በላይ «ሚራፍሎሬስ» (Miraflores) በተሰኘውና 20 ጫማ (6 ሜትር) ቁመት ባለው አሸዋማ ኮረብታ ዙሪያ የተጠቀለሉ ሆነው ተገኝተዋል።

​በናሳ የጄት ፕሮፐልሽን ላቦራቶሪ የፕሮጀክቱ ዋና ሳይንቲስት አሽዊን ቫሳቫዳ እንደገለጹት፤ የምርምር ቡድኑ በኩሪዮሲቲ ካሜራዎች በርካታ አስደናቂ የተፈጥሮ አቀማመጦችን የተመለከተ ቢሆንም፣ አሁን የተገኘው ሰፊ የጂኦሜትሪ ንድፍ ግን በተለየ ሁኔታ ቀልብ የሚስብ ነው። ሳይንቲስቶቹ የተሰበሰቡትን ኬሚካላዊ እና መዋቅራዊ መረጃዎች በመተንተን ቅርጹ እንዴት ሊፈጠር እንደቻለ ምስጢሩን ለመፍታት እየሰሩ ይገኛሉ።

​እንደ ናሳ ገለጻ፤ ቀደም ሲል በፕላኔቷ ላይ የታዩ ተመሳሳይ ቅርጾች በውሃ መድረቅ ምክንያት ከተፈጠሩ የጭቃ ስንጥቆች (mud cracks) ጋር የሚመሳሰሉ ቢሆኑም፣ የአሁኑ አወቃቀር ግን በተለያዩ የተፈጥሮ ሂደቶች—ለምሳሌ በቅዝቃዜና በሙቀት መለዋወጥ ዑደት ወይም ደለል በሚጨመቅበት ወቅት ውሃ ተጭኖ በመውጣቱ ምክንያት ሊፈጠር እንደሚችል ይገመታል።

​ምንጭ፦ ናሳ / ሳይንስ ዘገባ