የትግራይ ክልል የፌዴራል መንግሥት ባለአደራ አስተዳደር ተቋቋመ፤ ዋና አስፈጻሚዎችም ተሾሙ

የኢ.ፌ.ዲ.ሪ. የፌዴሬሽን ምክር ቤት በሕገ መንግሥቱ አንቀጽ 62 (9) እና በዐዋጅ ቁጥር 359/1995 አንቀጽ 14/2/ለ/ መሠረት የትግራይ ክልል ጊዜያዊ አስተዳደር እንዲቋቋም ባስተላለፈው ውሳኔ እና ለሚኒስትሮች ምክር ቤት በሰጠው ሥልጣን መሠረት፣ የኢፌዴሪ መንግሥት የትግራይ ክልልን የሚያጸና ውሳኔ መውሰዱን የጠቅላይ ሚኒስትር ጽሕፈት ቤት በፌስቡክ ገጹ ባወጣው መግለጫ አስታወቀ።

እንደ ጠቅላይ ሚኒስትር ጽሕፈት ቤት መግለጫ፣ በትግራይ ክልል ተፈጥሮ የነበረውን ግጭት በፕሪቶሪያ ስምምነት መሠረት ለመፍታት የተደረገው ተደጋጋሚ ጥረት በሕወሐት ዕንቅፋትነት የተነሣ ሳይሳካ ቀርቷል። ሰላምን ያልፈለገው የሕወሐት አመራር ለአራተኛ ጊዜ የጀመረው አውዳሚ ጦርነት በሽንፈት መጠናቀቁ የተገለጸ ሲሆን፣ የትግራይ ሕዝብ የራቀውን ሰላም እንዲጎናጸፍ፣ ራስን በራስ የማስተዳደር መብቱ እንዲረጋገጥ እንዲሁም የልማት ትሩፋቶችን ለማጣጣም ከግጭት አዙሪት መውጣት እንዳለበት ተመላክቷል። ለዚህም ሕዝቡ በፌዴሬሽኑ ውስጥ የሚገባውን ቦታ አግኝቶ ሰላሙን ማስከበር፣ ትኩረቱን በልማት ላይ ማድረግና ከሌሎች የኢትዮጵያ ሕዝቦች ጋር በኅብረ ብሔራዊ አንድነት ጸንቶ መኖር እንዳለበት ተገልጿል።

እነዚህን ሁኔታዎች ባጠረ ጊዜ ለማመቻቸት እንዲቻል የትግራይ ክልል የፌዴራል መንግሥት ባለአደራ አስተዳደር በሚኒስትሮች ምክር ቤት ደንብ መሠረት የተመሠረተ ሲሆን፣ ለሚቀጥሉት 6 ወራት ክልሉን የሚያስተዳድር ይሆናል። ባለአደራ አስተዳደሩ በክልሉ ያለውን የሰላምና የመረጋጋት ችግር በፍጥነት መፍታት፣ የፈረሱ የመንግሥት መዋቅሮችን መልሶ መዘርጋት፣ በጦርነት የተጎዱ መሠረተ ልማቶችን በመጠገን ወደ ሥራ ማስገባት፣ የተፈናቀሉትን ወደየቀያቸው መመለስ እና ተቋርጠው የነበሩ ማኅበራዊ አገልግሎቶችን የማስቀጠል ዋና ዋና ተግባራት ተጥለውበታል።

በተጨማሪም አስተዳደሩ የተረጋጋ የፖለቲካ ሁኔታ ፈጥሮ በ6 ወር ጊዜ ውስጥ ነጻና ግልጽ ምርጫ በማካሄድ ትግራይ የፌዴሬሽኑ መደበኛ አካል የምትሆንበትን ሁኔታ ያመቻቻል። ከፌዴራል የመከላከያ፣ የፖሊስና የደኅንነት ተቋማት እንዲሁም ከትግራይ የጸጥታ ኃይሎች ጋር በመቀናጀት ታጣቂዎች ትጥቃቸውን አስረክበው ወደ ሰላማዊ ኑሮ እንዲመለሱና ተሐድሶ እንዲያደርጉ ሁኔታዎችን የማመቻቸት፣ የክልሉን የጸጥታ መዋቅር እንደ አዲስ የማዋቀር፣ የሕዝቡን ሥነ ልቡና የማስተካከል፣ የሚዲያ ሥራዎችን የማስተባበር እና ለቀጣዩ ምርጫ አካታች ሁኔታዎችን የማዘጋጀት ኃላፊነት ተሰጥቶታል።

የባለአደራ አስተዳደሩ በሚያከናውናቸው ተግባራት ሁሉ የኢትዮጵያን ብሔራዊ ጥቅሞች፣ የግዛት አንድነትና የትግራይ ሕዝብን መሠረታዊ ጥቅሞች መሠረት ማድረግ እንዳለበት የጠቀሰው መግለጫው፤ በሕዝብ የተመረጠ መንግሥት እስከሚቋቋም ድረስ ከዕለት ተዕለት አገልግሎቶችና ለምርጫ አስቻይ ሁኔታዎችን ከመፍጠር ባሻገር ረዘም ያለ ስትራቴጂያዊ አንድምታ ባላቸው ጉዳዮች ላይ እንደማይንቀሳቀስና ተግባሩንም ከፌዴራል መንግሥት በሚሰጠው አቅጣጫ መሠረት እንደሚያከናውን አስታውቋል።

በመጨረሻም የጠቅላይ ሚኒስትር ጽሕፈት ቤት የባለአደራ አስተዳደሩን ዋና አስፈጻሚዎች ሹመት ይፋ አድርጓል። በዚሁ መሠረት አቶ አሰፋ አብርሃ ሐጎስ የአስተዳደር እና የሕዝብ አገልግሎት ዋና አስፈጻሚ፣ ዶክተር ቴዎድሮስ አረጋይ ወ/ሥላሴ የኢኮኖሚ እና መልሶ ግንባታ ዋና አስፈጻሚ፣ ብ/ጄ ገብረ እግዚአብሔር በየነ ኃይሉ የጸጥታና ሰላም ዋና አስፈጻሚ፣ አቶ ረዳኢ ኃለፎም ወ/ሥላሴ የፖለቲካ እና ሕዝብ አደረጃጀት ዋና አስፈጻሚ እንዲሁም ዶክተር ሽሻይ አማረ የመቐለ ከተማ ከንቲባ በመሆን ተሾመዋል። ለሚያከናውኗቸው ተግባራትም ከፌዴራል መንግሥት አስፈላጊው መመሪያ፣ ድጋፍና ክትትል እንደሚደረግላቸው ተገልጿል።