የዘመን ባንክ አጠቃላይ የሀብት መጠን 116 ቢሊዮን ብር መድረሱ ተገለፀ

በኢትዮጵያ የባንክ ኢንዱስትሪ ውስጥ ፈር ቀዳጅ ከሆኑት የግል የፋይናንስ ተቋማት አንዱ የሆነው ዘመን ባንክ፣ በተጠናቀቀው የበጀት ዓመት ያስመዘገበው የፋይናንስ አፈጻጸም ተቋሙ የደረሰበትን ጠንካራ የዕድገት ደረጃ የሚያሳይ ነው። ባንኩ ከሐምሌ 17 እስከ 18 ቀን 2018 ዓ.ም ባካሄደው ዓመታዊ የማኔጅመንት ስብሰባ ላይ ይፋ ያደረጋቸው መረጃዎች እንደሚያመለክቱት፣ ተቋሙ በሁሉም የፋይናንስ መለኪያዎች ላይ ከፍተኛ ዕድገት አስመዝግቧል።

​በበጀት ዓመቱ ባንኩ ከ10.2 ቢሊዮን ብር በላይ ያልተጣራ ትርፍ ማድረሱ የገበያ ድርሻውን እና የትርፋማነት አቅሙን የሚያረጋግጥ ነው። የባንኩ አጠቃላይ የሀብት መጠን 116 ቢሊዮን ብር መድረሱ ደግሞ ተቋሙ በኢንዱስትሪው ውስጥ ያለውን የፋይናንስ ጉልበት የሚያሳይ ትልቅ ማሳያ ነው።

​የባንኩ ዋና ሥራ አስፈጻሚ ተወካይ እና የሪቴል ባንኪንግ ቺፍ ኦፊሰር አቶ አስራት ታደሰ እንዳስታወቁት ​የተከፈለ ካፒታል ከ14 ቢሊዮን ብር በላይ የደረሰ ሲሆን

​ጠቅላላ ገቢው 17.8 ቢሊዮን ብር መመዝገቡ ተገልጿል። የባንኩ ጠቅላላ ካፒታል መጠንም  26 ቢሊዮን ብር ደርሷል ተብሏል።

​እነዚህ ቁጥሮች የሚያመላክቱት ባንኩ የካፒታል አቅሙን በማጠናከር ሊያጋጥሙ የሚችሉ የፋይናንስ ስጋቶችን ለመቋቋም የሚያስችል ጠንካራ መሰረት መገንባቱን ነው።

​የባንኩ የደንበኞች የተቀማጭ ገንዘብ መጠን ከባለፈው ዓመት ጋር ሲነጻጸር በ32 በመቶ በማደግ 85.4 ቢሊዮን ብር መድረሱ፣ ደንበኞች በባንኩ ላይ ያላቸው እምነት እየጨመረ መምጣቱን ያሳያል። ይህ የተቀማጭ ገንዘብ ዕድገት ባንኩ ለተለያዩ የኢኮኖሚ ዘርፎች የሚያቀርበውን የብድር መጠን እንዲያሳድግ አግዞታል። በዚህም መሠረት የተበዳሪዎች የብድር መጠን 52.59 ቢሊዮን ብር መድረሱ ተገልጿል።

​በሌላ በኩል፣ ሀገሪቱ ካለችበት የውጭ ምንዛሬ እጥረት አንጻር ባንኩ 698 ሚሊዮን የአሜሪካ ዶላር የውጭ ምንዛሬ ማግኘቱ ለአስመጪዎች፣ ለላኪዎች እና ለኢንቨስትመንት እንቅስቃሴዎች ትልቅ ድጋፍ መሆኑ አይቀሬ ነው።

​ዘመን ባንክ የንግድ እንቅስቃሴውን ከማስፋፋት ጎን ለጎን ማህበራዊ ኃላፊነቱን ለመወጣት ያደረጋቸው እንቅስቃሴዎች የሚወደሱ ናቸው። በተለይም ​በትምህርት ቤቶች ውስጥ የፋይናንስ እውቀት ማደናበሪያ ስልጠናዎችን መስጠቱ ተጠቃሽ ነው። 

​ህብረተሰቡን ከፋይናንስ አታላዮች እና ማጭበርበሮች ለመጠበቅ የሚያስችሉ ትምህርታዊ መልእክቶችን ሲያስተላልፍ መቆየቱ ተቋሙ ለደንበኞቹ እና ለማህበረሰቡ ደህንነት የሚሰጠውን ትኩረት ያሳያል።

​በአጠቃላይ፣ የዘመን ባንክ የ2018 ዓ.ም የፋይናንስ አፈጻጸም በትርፋማነት፣ በካፒታል እድገት እና በሀብት ክምችት በኩል ከፍተኛ ስኬት የተመዘገበበት ነው። ይህ አፈጻጸም ባንኩ በኢትዮጵያ የባንክ ዘርፍ ውስጥ ያለውን ተወዳዳሪነት የሚያጎለብተው ከመሆኑም በላይ፣ ወደፊት ለሚደረጉ የዲጂታል እና የስትራቴጂክ ዕድገቶች ምቹ ሁኔታን ይፈጥርለታል።