በሳንድፎርድ ትምህርት ቤት ወላጆችና በትምህርት ሚኒስቴር መካከል ሲካሄድ የሰነበተው የሕግ ክርክር በወላጆች አሸናፊነት ተጠናቀቀ

በፕሮፌሰር ብርሃኑ ነጋ የሚመራው የትምህርት ሚኒስቴር የግልና የዓለም አቀፍ ትምህርት ቤቶችን ፈቃድ አሰጣጥና እድሳት መመሪያ ለማሻሻል ያወጣው ማሻሻያ በፌደራል ከፍተኛ ፍርድ ቤት ውድቅ መደረጉን አዲስ ፎርቹን ዘግቧል።

በፍርድ ቤቱ የአስተዳደር ችሎት የተሰየሙት ሦስት ዳኞች፣ ሚኒስቴር መሥሪያ ቤቱ ያወጣው ይህ ማሻሻያ ሕጋዊ አካሄድን ያልተከተለ፣ ከተሰጠው ሥልጣን በላይ የሆነና ከበላይ ሕጎች ጋር የሚጋጭ ነው ሲሉ ውሳኔ ሰጥተዋል። ውሳኔው ለአንድ ዓመት ገደማ ሲከራከሩ ለቆዩት 132 የሳንድፎርድ ዓለም አቀፍ ትምህርት ቤት ወላጆች ትልቅ ድል የተጎናጸፉበት አጋጣሚ ሆኗል።

​እንደ አዲስ ፎርቹን ዘገባ፣ ክርክሩ የተቀሰቀሰው ሳንድፎርድ ትምህርት ቤት ዝቅተኛ የትምህርት ክፍያ ይከፍሉ የነበሩ ተማሪዎችን “ክፍያን ማጣጣም” (harmonisation) በሚል ሽፋን ወደ ከፍተኛው የክፍያ ተመን ለማሳደግ ባደረገው እንቅስቃሴ ነው። ወላጆች ይህ አሰራር የትምህርት ክፍያ ጭማሪ ነው ሲሉ በመቃወማቸው ጉዳዩ ወደ ሕግ አምርቷል።

ጉዳዩ በፍርድ ቤት በመታየት ላይ እያለ፣ ትምህርት ሚኒስቴር በወጣው ማሻሻያ “የትምህርት ክፍያ ጭማሪ” እና “የክፍያ ማጣጣም” የሚሉትን ፅንሰ-ሐሳቦች በመለየት ትምህርት ቤቶች አሰራሩን እንዲተገብሩ መንገድ ከፍቶ ነበር።

​ወላጆች በትምህርት ሚኒስቴርና በፍትሕ ሚኒስቴር ላይ ባቀረቡት ክስ፣ መመሪያው አስፈላጊውን የሕዝብና የባለድርሻ አካላት ውይይት ሳይደረግበት እንዲሁም በፍትሕ ሚኒስቴር በኩል ማለፍ የሚገባውን የሕግ ሂደት ሳይከተል በችኮላ የተጸደቀ ነው ሲሉ ተከራክረዋል።

የሕዝብ ተወካዮች ምክር ቤት የትምህርት፣ የሰው ሀብት ልማት፣ የሥራ ስምሪትና ቴክኖሎጂ ጉዳዮች ቋሚ ኮሚቴ ሰብሳቢ ዶክተር ነገሪ ሌንጮም ቢሆኑ የማሻሻያውን አወጣጥ ሂደት በተመለከተ ጥያቄ አንስተው እንደነበር በክርክሩ ወቅት ተገልጿል።

​በትምህርት ሚኒስቴር በኩል የሕግ አገልግሎት ዋና ሥራ አስፈጻሚ አቶ ዮሴፍ ሽፈራው፣ ማሻሻያው አዲስ ሕግ የሚያወጣ ሳይሆን ነባሩን ግልጽ ለማድረግ የተደረገ ነው በሚል የተከራከሩ ቢሆንም፣ ፍርድ ቤቱ ግን የወላጆችን አቤቱታ በመቀበል ማሻሻያው ሕጋዊ መሠረት የለውም ሲል ሰርዞታል።

የሕግ ባለሙያው አቶ ዘበነ ፍቅሬ ለአዲስ ፎርቹን በሰጡት አስተያየት ውሳኔውን የደገፉ ሲሆን፣ አቶ ዮሴፍ በበኩላቸው በትምህርት ሚኒስቴር በኩል በውሳኔው ባይደሰቱም የፍርድ ቤቱን ብይን የተቀበሉ መሆናቸውንና በቀጣይ መመሪያውን በሕጋዊ መንገድ እንደገና ማሻሻል ወይም ይግባኝ ማለት በሚሉ አማራጮች ላይ እየመከሩ መሆኑን ተናግረዋል።

ውሳኔው ሳንድፎርድን ጨምሮ ተመሳሳይ የክፍያ ማጣጣም አሰራርን ሲከተሉ ለነበሩ ሌሎች ዓለም አቀፍ ትምህርት ቤቶችም ትልቅ ተፅዕኖ የሚያሳድር መሆኑ ተጠቅሷል።