የአፍሪካ ህብረት በስፔን እና ፈረንሳይ ለደረሰው የሰደድ እሳት አደጋ የተሰማውን ሀዘን ገለፀ

የአፍሪካ ህብረት ኮሚሽን በስፔን እና በፈረንሳይ የተለያዩ አካባቢዎች የተከሰተው አስከፊ የሰደድ እሳት አደጋ ያስከተለውን ሰብአዊ እና ቁሳቁስ ውድመት በመመልከት የተሰማውን ጥልቅ ሀዘን በመግለፅ ከተጎዱት ሀገራት ጎን መቆሙን አረጋግጧል።

ሐምሌ 21 ቀን 2018 ዓ.ም (July 28/2026) ከአዲስ አበባ የተሰጠው ይፋዊ መግለጫ እንዳመለከተው፣ የህብረቱ ሊቀመንበር ክቡር አምባሳደር ማህሙድ አሊ የሱፍ ህይወታቸውን ላጡ ወገኖች ቤተሰቦች እንዲሁም ለሁለቱ ሀገራት ህዝቦች እና መንግስታት መፅናናትን ተመኝተዋል። 

አደጋው የሰው ህይወት ከማጠፉም በላይ በርካታ ዜጎችን ከቀያቸው ያፈናቀለ፣ በንብረት እና በአካባቢ ጥበቃ ላይ ከፍተኛ ውድመት ያደረሰ በመሆኑ ጥልቅ አዘን እንዳሳደረባቸው ገልፀዋል።

ሊቀመንበሩ አክለውም ከጊዜ ወደ ጊዜ እየጨመረ የመጣው የፅኑ አየር ንብረት መዛባት እና ድንገተኛ አደጋዎች አለም አቀፍ ትብብርን የማጠናከር አስፈላጊነትን በግልፅ እንደሚያሳዩ አስገንዝበዋል። 

የአፍሪካ ህብረት በአየር ንብረት ለውጥ ላይ ያለውን የጋራ አቋም መሰረት በማድረግ፣ የአየር ንብረት ለውጥን ለመቋቋም የሚደረጉ ጥረቶችን ማጠናከር፣ ለሁኔታው ምላሽ የሚሰጡ የአሰራር ስልቶችን ማስፋፋት እና የተገቡ የፋይናንስ እና ቴክኖሎጂ ድጋፍ ቃልኪዳኖችን መፈፀም እንደሚገባ አሳስበዋል። በተለይም ለአደጋው በቀላሉ ተጋላጭ የሆኑ ሀገራትን እና ማህበረሰቦችን መደገፍ የጋራ ሃላፊነት መሆኑን አብራርተዋል።

በመጨረሻም፣ የአፍሪካ ህብረት ለስፔን እና ለፈረንሳይ አጋርነቱን አዲስ በማድረግ፣ ሁለቱ ሀገራት እና ህዝቦቻቸው ካላቸው ጠንካራ የመቋቋም አቅም በመነሳት ይህንን አስቸጋሪ ጊዜ አልፈው በፍጥነት እንደሚያገግሙ ሙሉ እምነት እንዳለው ገልፀዋል። አደጋውን ለመቆጣጠር እና ለማገገም የሚደረጉ ጥረቶች ሁሉ ስኬታማ እንዲሆኑ ህብረቱ አጋርነቱን አረጋግጧል።