ኡበር አሽከርካሪው በሰከረች እንስት ላይ በፈጸመው ድርጊት የ40 ሚሊዮን ዶላር ካሳ እንዲከፍል ተወሰነበት

በደቡብ ካሊፎርኒያ አንድ የኡበር አሽከርካሪ ሰክራ የነበረችን ወጣት በፍጥነት መንገድ (Freeway) ዳር አውርዶ በመሄዱ ምክንያት በተከሰተ አደጋ ሕይወቷ በማለፉ፣ ድርጅቱ 40 ሚሊዮን ዶላር የካሳ ክፍያ እንዲፈጽም ተወሰነበት።

​እ.ኤ.አ. በ2023 በደረሰው በዚህ አደጋ ሕይወቷ ያለፈው የ23 ዓመቷ ኤሚሊ ኖርማንዲን-ፓርከር ቤተሰቦችን ወክሎ የተከራከረው ‘ፓኒሽ ሼአ ራቪፑዲ’ የተሰኘው የሕግ አማካሪ ድርጅት እንደገለጸው፣ የግልግል ዳኛው ሪቻርድ ስቶን ‘ኡበር የቴክኖሎጂ መተግበሪያ ብቻ የሚያቀርብ በመሆኑ በአሽከርካሪዎቹ ጥፋት በህግ ተጠያቂ አይሆንም’ በማለት ያቀረበውን መከራከሪያ ውድቅ አድርገውታል።

​የ2020 የዩ.ሲ.ኤል.ኤ (UCLA) ተመረቂ የነበረችው ኤሚሊ፣ ከጓደኛዋ ጋር በነበረችበት ወቅት ወደ ቤቷ ለመመለስ በኡበር መተግበሪያ ታክሲ ጠራች። በጉዞው ወቅት አብራት የነበረችው ጓደኛዋ በመኪናው ውስጥ በማስታወኳ ምክንያት አሽከርካሪው ቩ ትራን ህግ በመጣስ መኪናውን በ‘ስቴት ራውት 73’ ፈጣን መንገድ መውጫ አጠገብ ባለው አደገኛ ቦታ ላይ አቆመ።

​አሽከርካሪው ሁለቱንም እንስቶች ከመኪናው ካወረዳቸው በኋላ የፅዳት ክፍያ እንዲከፍሉት ጠየቀ። በዚህም ምክንያት በከባድ ስካር ላይ የነበረችው ኤሚሊ በተጨናነቀው መንገድ ዳር ብቻዋን እንድትቀር በመደረጓ በሌላ ተሽከርካሪ ተመታ ሕይወቷ አልፏል። አሽከርካሪው ድርጊቱን ከፈጸመ በኋላ ለአደጋ ጊዜ ጥሪ (911) ከመደወል ይልቅ ቦታውን ለቆ በመሄድ ከኤሚሊ ሂሳብ ላይ የፅዳት ክፍያ እንዲቆረጥ ለኡበር ጥያቄ አቅርቦ ነበር።

​የግልግል ዳኛው አሽከርካሪው የተሳፋሪዎቹን ደህንነት ለአደጋ መዳረጉን እና "ከተሳፋሪዎቹ ደህንነት ይልቅ ለአዲሱ መኪናው የተለየ መጨነቁን" ገልጸዋል። የሟች ወላጆች በሰጡት አስተያየት "ልጃችን ኡበር የሚያዘውን ነገር ሁሉ አድርጋለች፤ ጠጥታ ላለመንዳት ኃላፊነት የተሞላበት ውሳኔ የወሰደችው በኡበር ተማምና ነበር፤ ያ እምነታችን ግን የልጃችንን ሕይወት ቀጥፏል" ብለዋል።

​ኡበር በበኩሉ ለቤተሰቡ ያለውን ዘላቂ ማጽናኛ ገልጾ፣ ወደፊት መሰል አደገኛ ቦታዎች ላይ ተሳፋሪዎችን ማውረድን የሚያስቀሩ የአሰራርና የቴክኖሎጂ ማሻሻያዎችን እያደረገ መሆኑን አስታውቋል።