ከ7ኛው ጠቅላላ ምርጫ በኋላ አዲሱ የኢትዮጵያ መንግሥት መስከረም 25 ቀን ሊመሠረት ነው

ኢትዮጵያ 7ኛውን ጠቅላላ ምርጫ ማጠናቀቋን ተከተሎ፣ መስከረም 25 ቀን 2019 ዓ.ም አዲሱን የሕግ አስፈጻሚ መንግሥት በይፋ እንደሚመሠረትና የምክር ቤቱን የመክፈቻ ሥነ-ሥርዓት እንደሚካሄድ ተገለጸ።

የሕዝብ ተወካዮች ምክር ቤት አፈ-ጉባኤ ታገሰ ጫፎ መስከረም 13 ቀን 2019 ዓ.ም ባወጡት ይፋዊ መግለጫ፣ ለመንግሥት ምስረታው ሥነ-ሥርዓት አስፈላጊው የሕግና የሎጂስቲክስ ዝግጅት በሙሉ መጠናቀቁን አረጋግጠዋል። በምርጫው ከ54 ሚሊዮን በላይ መራጮችና 10,438 ዕጩዎች ከ42 የፖለቲካ ፓርቲዎች የተሳተፉ ሲሆን፣ ሂደቱም ሰላማዊ፣ ዲሞክራሲያዊ ሆኖ መጠናቀቁን ገልፀዋል።

በኢ.ፌ.ዴ.ሪ ሕገ-መንግሥት አንቀጽ 50 ንኡስ አንቀጽ 3 መሠረት፣ የሕዝብ ተወካዮች ምክር ቤት የፌደራል መንግሥቱ ከፍተኛ የሥልጣን አካል ሆኖ ተጠሪነቱም በቀጥታ ለሀገሪቱ ሕዝብ እንደሆነ ተደንግጓል። በአንቀጽ 58 ንኡስ አንቀጽ 2 መሠረት ደግሞ የምክር ቤቱ ሦስተኛ የሥራ ዘመን በመስከረም ወር የመጨረሻ ሳምንት ሰኞ ይጀምራል።

በሕገ-መንግሥቱ አንቀጽ 56 መሠረት በምክር ቤቱ የአብላጫ መቀመጫ ያገኘው የፖለቲካ ድርጅት ወይም ማኅበር አዲሱን የፌደራል መንግሥት የሕግ አስፈጻሚ አካል ያደራጃል፣ ይመራልም። በምርጫው በሕዝብ የተመረጠው አዲሱ አስተዳደር መስከረም 25 ቀን ሥልጣን በመረከብ ሀገሪቱን ለቀጣዮቹ አምስት ዓመታት (ከ2019 እስከ 2024 ዓ.ም) የመምራት ኃላፊነቱን ይረከባል።

በመግለጫው ማጠቃለያ ላይ የምክር ቤቱ አፈ-ጉባኤ ታገሰ ጫፎ፣ መጪው ዘመን የሰላም፣ የጤና፣ የደስታ፣ የፍቅር፣ የአንድነትና የብልፅግና እንዲሆን የተመኙ ሲሆን፣ ለኢትዮጵያና ለሕዝቧም በጎ ምኞታቸውን አስተላልፈዋል።