ጉግል ጂሚኒ ኤአይ (Gemini AI) የሳይበር ጥቃት በመፈጸም ሶስት ኩባንያዎችን ሰበረ

የጉግል ጂሚኒ (Gemini) አርቲፊሻል ኢንቴሊጀንስ ሞዴል በሳይበር ደህንነት ፈተና ወቅት ኢንተርኔትን በመጠቀም የሌሎች ኩባንያዎችን የመረጃ ስራዓት በመስበር መረጃዎችን መውሰዱ ተገለፀ። ይህም የጉግል ኤአይ ሞዴል በራሱ ውሳኔ እንዲህ አይነት ድርጊት ሲፈጽም የመጀመሪያው ነው።

​ጥቃቱ የተፈጸመው በግንቦት ወር 'ኢሬጉላር' (Irregular) በተባለ ገለልተኛ የሳይበር ደህንነት መገምገሚያ ኩባንያ በተካሄደ የፍተሻ ወቅት ነው።

​የጉግል የደህንነት ኢንጅነሪንግ ምክትል ፕሬዝዳንት ሄዘር አድኪንስ እንደተናገሩት፣ ጂሚኒ በመደበኛ የፈተና ሂደት ላይ እያለ በኢንተርኔት ላይ ይፋዊ መረጃዎችን በመፈለግ እና ሚስጥራዊ የካርድ/የመግቢያ መረጃዎችን (credentials) በመገመት ከፈተናው ክልል ውጪ ያሉ ሶስት የዌብሳይት ሲስተሞች ውስጥ ገብቷል።

​"የተጎዱት ሶስቱም አካላት እንዲያውቁት ያደረግን ሲሆን፣ ከአሰልጣኝ አጋራችን ጋር በመሆን በፈተና ሂደታቸው ላይ አስፈላጊውን ማስተካከያ አድርገናል" ያሉት አድኪንስ፣ "ይህ ክስተት ኃይለኛ የኤአይ ሞዴሎች በኃላፊነት ስሜት እንዲሰሩ የማሰልጠን አስፈላጊነትን ያሳያል" ብለዋል።

​የኢሬጉላር (Irregular) ቃል አቀባይ በበኩላቸው ክስተቱ በሌሎች ኤአይ ላቦራቶሪዎች ላይም ያጋጠመ መሆኑን እና አግባብ ያላቸው አካላት በሐምሌ ወር መጨረሻ ላይ ማሳወቃቸውን ገልጸዋል። "በእኛ በኩል የነበሩ የታወቁ ችግሮች በሙሉ ከሳምንታት በፊት ተፈትነዋል" ብለዋል።

​ከኢሬጉላር ጋር የተያያዙ ተመሳሳይ ክስተቶች በሜታ (Meta)፣ አንትሮፒክ (Anthropic) እና ኦፕን ኤአይ (OpenAI) ይፋ ተደርገዋል። ሜታ በነሐሴ ወር እንደገለጸው ክስተቱ የላቀ የሳይበር ጥቃት ወይም ከቁጥጥር ውጭ የሆነ ማምለጥን የሚያካትት እንዳልሆነ ሲሆን፣ ኢሬጉላር ግን ደህንነቱ የተጠበቀ የኤአይ የሳይበር ደህንነት ግምገማዎችን ለማካሄድ ምርጥ አሰራሮችን እያዘጋጀ እንደሆነ ተናግሯል።

​ይህ ክስተት የኤአይ ኤጀንቶች የበለጠ ነፃነት እና ወደ ኢንተርኔት እንዲሁም የኮምፒውተር ስራዓቶች የመግባት እድል እያገኙ ሲመጡ ስለሚያስፈልጉት የደህንነት ጥንቃቄዎች ጥያቄዎችን አስነስቷል።

​ዎል ስትሪት ጆርናል (The Wall Street Journal) እንደዘገበው፦

​በአንዱ አጋጣሚ የጂሚኒ ሞዴል የተጠበቀ ሲስተም ውስጥ እስኪገባ ድረስ የይለፍ ቃሎችን (passwords) በግምት ሲሞክር ነበር።

​በሌሎቹ ሁለት አጋጣሚዎች ደግሞ ሞዴሉ በይፋዊ መረጃ ማከማቻ ውስጥ የመግቢያ መረጃዎችን በማግኘት የተጠበቁ ሲስተሞች ውስጥ መግባት ችሏል።

​አድኪንስ አክለው እንደገለጹት በሶስቱም አጋጣሚዎች ሞዴሉ የሳይበር ጥቃቱን ወዲያውኑ አቁሟል።